MARITZ SE PERI-PERI HOENDERMAGIES
2 kg skoongemaakte hoendermagies. Kook vir 30 minute in die drukkoker.
Maak 2-3 skeute olie warm in ‘n swaarboom kastrol. Sny 3 groot uie in klein blokkies en voeg by die olie. Roer oor hoë hitte tot uie verbruin.
Voeg by:
1 teelepel borrie
2 opgehoopte eetlepels medium sterkte kerrie mengsel
1 opgehoopte eetlepel vars knoffelvlokkies
1 opgehoopte eetlepel knoffel en gemmer smeer
1 eetlepel sout
Roer sodat uie en speserye met mekaar praat.
Skil 3 groot aartappels en sny in klein blokkies. Voeg by mengsel in kastrol. (Die aartappel is om sag te kook en die peri peri sous aan die einde dik te maak) Roer deur. Proe en indien nodig, voeg nog sout by na smaak.
Nou voeg jy die saggekookte hoendermagies van die drukkoker in die kastrol op stoof met gaatjieslepel. Roer goed deur en voeg so 2 koppies water by alles.
Roer deur en oor matige hitte kook alles saam tot aartappels sag is.
Nou is die Peri Peri Hoendermagies smelt-in-mond-lekker en reg om te eet met rys, pap, vetkoek, brood of broodrolle.
Sou die sous té waterig na smaak wees. Meng 1 opgehoopte eetlepel Maizina en 1 eetlepel Bisto (Bief of Hoender) met kwart koppie water en meng by jou hoendermagie pot. Kook vir so 3 minute.
Resep geplaas deur JT Maritz
Foto: JT Maritz
