MARDI SE HOENDER MUFFINS
1 kg hoenderborsies, fyngemaal
4 eierwitte
1 ½ – 2 koppies gewone hawermout
½ teelepel gemaalde komyn
½ teelepel gedroogde tiemie
2 teelepels droë geel mostertpoeier
1 teelepel swartpeper
1 teelepel rissiepeper
1 teelepel sout
2 eetlepels gedroogte knoffel of 2 knoffelhuisies, gekneus
1 ui, gekap
4 selderystokkies (fyn gekap)

Voorverhit oond tot 180ºC.
Sproei ‘n muffin of broodpannetjie met Spray ‘n Cook.
Meng al die bestanddele saam in ‘n groot bak.
Skep die mengsel in die muffin- of broodpan.
Bak vir 40 minute.
Resep:  Mardi Delport

VLEISPASTEITJIES MET SKON TIPE SLAPDEGIE
Maak maalvleis gaar met chutney, uie ens.
Deeg:
Klits saam:
¾ koppie melk
½ koppie olie (en neem minder, en dit is net so lekker)
2 eiers
1 koppie koekmeel
3 teelepels bakpoeier
¼ teelepel sout
1 teelepel Aromat

Meng alles goed saam.
Deeg bietjie dikker as pannekoek deeg.
Spuit kolwyntjie pannetjies.
Skep lepel vol deeg onder in.
Skep dan een lepel vulsels in (maalvleis klaar gaar).
Skep dan weer deeg op om die maalvleis te bedek.
Bak ongeveer 15 min tot ligbruin (180 grade C).
Maak net seker jou maalvleis is nie te souserig nie, want dit maak jou deeg pap. Geniet. Heerlik koud ook, pak dit graag in kosblik, ook sommer lekker vir ‘n “snack”. Hou dit in die yskas vir die kinders as hul wil peusel.
Foto: Lelane Van Der Walt‎, Elizabeth Margaret Hendrikz en Diane Roode Hancox

Sous (Opsioneel ekstra)
Braai uie en knoffel in botter tot lekker sag.
Voeg bisto by om ‘n dik sous te maak.
Ek het ‘n bietjie vars room en melk bygevoeg vir ‘n romerige tekstuur. (dit maak ook die sous ‘n ligter kleur)
Bedien met aartappelskyfies en geniet!!
Foto en resep: Marina Hiscock

TUNA GEVULDE ROLLETJIES
Bid dat jy mayonnaise, origanum, uie en geblikte tuna in die huis het.
Lekker vir kosblik ook.
So nie, draf maar weer kafee toe of stuur die kids.
Maak die blikkies tuna oop, dreineer die water/olie af.
Skep in mengbak.
Kap uie fyn, of vra die kids of man om dit te doen as jy bang is jou ogies gaan traan.
Meng die mayonnaise, origanum en ui daarby.
Maak ‘n gatjie in die rolletjie en hol die broodrolletjies uit. Moet nou nie te wild tekere gaan nie, want anders breek jy die rolletjie.
Vul die uitgeholde broodrolletjie met die gemengde tuna en rasper kaas oor die gatjie.
Gee die res van die uitgeholde brood vir die kids om te eet as hulle vreeslik honger is of gee dit vir die voeltjies wat ook honger is of die hond.
Idee Marie Rheeder Troskie

VINNIGE KAASVULSELS VIR TOEBROODJIES
Maaskaas/roomkaas, gemeng met een van die volgende bestanddele:
heuning, tamatiesous, vissmeer, gekapte eier, gaar geurige maalvleis, gekapte ui en piekels.
Maaskaas, gemeng met gerasperde kaas, gekapte radys en komkommer of agurkies en mayonnasie.
Gerasperde kaas, gemeng met toebroodjiesmeer, saam met ‘n slaaiblaar.
Gekrummelde bloukaas, gemeng met toebroodjiesmeer.
Krummelmaaskaas (gegeur of ongegeur), gemeng met toebroodjiesmeer, saam met ‘n skyfie salami (veral op rogbrood).
Skyfies mozzarellakaas, salami en tamatie op rogbrood. Komkommer en blaarslaai is ook lekker hiermee saam.

VINNIGE EIERVULSELS
Roereier, gemeng met ‘n bietjie mayonnaise en ‘n bietjie
tamatiesous, of roereier en tamatieskyfies.
Fyn gekapte hard gekookte eier, gemeng met brosgebraaide spekvleis en
aangeklam met ‘n bietjie slaaisous of mayonnaise.
Fyngemaakte hard gekookte eier, gemeng met aangemaakte mosterd.
Hard gekookte eierskyfies, komkommerskyfies en toebroodjiesmeer.
Wenk: ‘n Hard gekookte eier bly langer goed as dit nie afgedop word
nie.
Hard gekookte eiers kan vir ‘n paar dae in die yskas gebêre word.

VINNIGE VLEISVULSELS VIR BROODJIES
Skyfies koue bees-, lams-, vark- of hoendervleis gemarineer in
Franse slaaisous, saam met slaaibestanddele.
Koue bobotie saam met blatjang en piesangskyfies.
Gerasperde biltong, aangeklam met ‘n bietjie aangemaakte mosterd.
Gekapte Weense worsies, gemeng met aangemaakte mosterd en
mayonnaise.
Fyngekapte ham, gemeng met gekapte, ingemaakte pynappel en
mayonnaise.
Lewerpatee, tamatieskyfies en blaar slaai.

Gevlokte (of skyfies) oorskiethoender of -kalkoen, komkommerskyfies
en toebroodjiesmeer. (Gekrummelde bloukaas kan by toebroodjiesmeer
gevoeg word.)
Dun skyfies Frankfurters of gaar boerewors saam met mosterd (sous
of aangemaakte mosterd).
Soutbeesvleis en agurkies, aangeklam met mayonnaise. Geur met
blatjang en gekapte grasui.

BOSBESSIE EN SAAD STAFIES
Ek het hierdie resep op ‘n TV program vroeër in die jaar gesien – kan nie onthou watter ene nie en dit nou uiteindelik gemaak. Dit is woes lekker vir kosblikke of sommer net ‘n snackie as die hongermonster ontydig is!
250 ml geroosterde muesli (ek gebruik Nature’s Source Crispy Crunch – Whole rolled oats and toasted rice)
750 ml Rice Krispies
125 ml klapper
60 ml sonneblom sade
60 ml geroosterde sesamsade
100 g gedroogde bosbessies (cranberries) of enige ander droë vrugte na smaak
125 gm botter
80 ml heuning
80 ml gladde grondboontjiebotter
125 ml ligte bruin suiker

Meng die muesli, Rice Krispies, klapper, sonneblom sade, sesamsade en bosbessies saam in ‘n groot bak en sit eenkant.
Voeg botter, heuning, grondboontjiebotter en suiker saam in ‘n klein potjie en roer oor lae hitte totdat die suiker opgelos het.
Laat kook, verlaag hitte en prut terwyl aanhoudend geroer word vir 5-10 minute totdat dit effens verdik. Verwyder van hitte en voeg by die droë bestanddele. Meng goed.
Druk goed vas in ‘n 18 x 28 cm, gesmeerde, reghoekige bakplaat en plaas in yskas tot gestol.
Sny in stafies (Dit is redelik bros, so sny versigtig.)
Bron: Rona Swart

GRONDBOONTJIEBOTTER EN MUESLIBLOKKIES

Propvol proteïene en vesel.

125 ml klapper
1 blik kondensmelk
750 ml geroosterde muesli
250 ml pofrys (Rice Crispies)
60 ml heuning
60 ml grondboontjiebotter
60 ml sagte botter
125 ml ongesoute grondbone, gerooster en grof gekap
250 ml versiersuiker

Smeer ‘n pan van 200 mm x 300 mm met botter en voer die bodem en kante uit met bakpapier. Sprinkel die helfte van die klapper egalig oor die bodem van die pan. Meng die res van die bestanddele (behalwe die orige klapper) in ‘n kastrol en verhit stadig tot kookpunt. Laat prut liggies vir ongeveer 15 minute, terwyl geroer word, tot dik. Skep op die klapper in die pan en versprei egalig. Sprinkel die orige klapper bo-oor en druk dit effens met jou hande op die grondboontjiemengsel vas. Bedek, en verkoel tot ferm. Sny in blokkies. Lewer ongeveer 20 blokkies.

MAX SE RATATOUILLE-ROL
Ons het dié ‘Ratatouille-rol’ vandag by ons braai bedien, met mengelslaai en ‘n avokado- en roomkaasslaaisous. Hoop julle kan dit ook geniet soos ons dit geniet het. Berei Ratatouille vooraf na smaak.
Braai saam in olyfolie:
1 rooiui, opgekap
bietjie knoffel en gemmer
1 eiervrug, opgesny, sny in skywe vooraf, besprinkel met sout, laat staan 30 minute en spoel af
1 elk rooi, groen en geel soetrissie, opgekap
2 – 3 gekapte tamaties
Ricotta of gerasperde Cheddar
Na al die bestandele saamgebraai is, laat dit ‘n ruk stowe tot sag.
Laat die mengsel afkoel en voeg kase van eie keuse by die mengsel.
Rol 1 “Cheese and Herb” blaardeeg bietjie dunner uit, behou die vierkant vorm.
Deel die vierkant in twee (anders hanteer dit te moelik).
Smeer die ratatouille mildelik oor die twee helftes deeg, nie tot op die rante wat moet heg nie en rol die gevulde deeg op.
Smeer water op die twee dele wat moet heg en plaas die naat na onder op ‘n gesmeerde bakplaat.
Smeer die deegrolle met geklitste eier en besprinkel met saadjies (opsioneel) en bak vir 45 – 60 minute teen 180° C.
Plaas die rolle op ‘n mooi opdienbord en garneer na smaak met vars kruieblare.
Sny in skywe en bedien met enige bykoss van jou keuse. Dit is heerlik!!!
Nota: Partykeer sny ons dit eers in wiele voor dit gebak word, smeer met geklitse eier en bak vir omtrent 20 – 30 minute en geniet.
Resep: Helene Kluge