HAMBURGER PATTIES MET SAMPIOENE
Het ook vandag patties gemaak vir hamburgers. Ek en manlief eet dit in slaaiblare toegevou en die kinders s’n op ‘n bun. Pattie resep:
1 kg maalvleis
250 g sampioene gerasper
1 ui gerasper
1 ½ teelepel sout
2 teelepel Italian herbs
Ek gebruik die voelselverwerker, meng alles saam, vorm patties. Die mengsel maak 8 patties van 150g elk.
Heerlik sappig, uie en sampioene het baie vog. My seuns eet nie sampioene nie, maar hierdie eet hulle, as ek nie die sampioene insit nie, hou hulle nie daarvan nie. As hulle maar net weet:-)

Resep geplaas deur Petri le Roux

DRIES SE HAMBURGER PATTIES
500 g bees maalvleis
½ koppie oats (hawermout)
¼ koppie bruismeel
4 teelepels beesstert soppoeier
4 teelepels bisto
1 eier
½ gerasperde ui
klein gerasperde aartappel

Meng alles goed deur. Maak bietjie groter as golf bal bolle. Rol dit in die meel. Druk plat en bak in klein bietjie warm olie. Draai baie om. As jy op dit druk met die eierspaan en dit sizzle nie meer nie dan is hy nog sappig en gaar. Geniet dit.

Bron: Driesman van der Vyver

TUISGEMAAKTE HOENDERBURGERS
Lizelle de jager se: Baie baie lekker rolletjies, ek kan dit aanbeveel
Dis ‘n lekker alternatief op biefburgers. En, natuurlik hoef jy nie jou eie rolletjies te maak as jy haastig is nie”.
Hoender “patties”
600 g hoendermaalvleis*
1½ koppie broodkrummels
1 ui, gerasper
1 soetrissie, gekap
‘n handvol gekapte pietersielie
sout en peper

Wit hamburgerrolletjies
500 g gewone koekmeel
1 sakkie kitsgis
½ teelepel sout
1 eetlepel strooisuiker
350 ml melk
25 g botter

Glaseer die rolletjies  met ‘n eier, knypie sout en 1 eetlepel melk

Patties:
Meng die bestanddele saam en vorm patties. Braai vier tot ses minute aan ‘n kant of bak tot albei kante mooi bruin is. Bedien met rolletjies en geurmiddels na jou smaak.
Rolletjies:
Meng die meel met die gis, sout en suiker in ‘n groot bak. Verhit die melk en botter totdat die botter begin smelt. Voeg dit by die droë bestanddele. Meng en voeg nog meel by as die deeg te nat is. Knie tot glad. Sit in ‘n gesmeerde bak, bedek en laat staan dit op ‘n warm plek vir ‘n uur om te rys (tot dubbelgrootte).
Druk die lug uit en sit op ‘n oppervlak wat met meel besprinkel is. Vorm ses burgergrootte rolletjies en plaas op ‘n gesmeerde bakplaat. Bedek en laat staan 30 minute om te rys.
Meng die eier, sout en melk en smeer dit aan die bokante van die rolletjies.
Bak 15 minute by 220ºC.
*vra die slagter by die supermark om hoendervleis te maal as daar nie klaargemaaldes is nie.

Resep geplaas deur Rina Kleinhans
Foto:  Izel van Zyl

BEN SE HAMBURGERS
Ek deel graag met julle een van my (en my seun) se gunstelinge:
1 kg steakmaalvleis
15 ml (1 eetlepel) fyn koljander
5 ml (1 teelepel) fyn kaneel
2 uie, fyn gekap of gerasper
3 knoffelhuisies, fyn gekap
5 ml (1 teelepel) vars gemmer, gerasper
45 ml (3 eetlepels) pietersielie, fyn gekap
sout en vars gemaalde swartpeper
1 ektragroot eier, geklits
6 hamburgerrolletjies
blaarslaai
2-3 groot ryp tamaties, in skywe gesnyMeng al die speserye saam met maalvleis, sout en peper.
Voeg knoffel, gerasperde ui en geklitste eier by.
Meng goed deur, vorm bolletjies, druk plat vir “patties”.
Braai, en maak jou hamburger met tamatieskywe en blaarslaai.
Resep geplaas: Joey Kruger

Sprinkel een ontvelde, ontbeende hoenderborsie met geursel- of braaisout en braai tot goudbruin en gaar.
Laat effens afkoel voor jy dit in skyfies sny.
Braai vier tot vyf repies strepiespek per broodjie.
Sny ‘n heerlike vars rooi tamatie in ronde skywe en spoel blaarslaai af.
Rooster drie snye wit-, bruin of wit- en bruinbrood.
Meng mayonnaise met mosterd om te geur.
Smeer al drie snye brood daarmee.
Pak die hoenderstukkies op die eerste broodjie, plaas ‘n sny brood daarop, pak dan tamaties, sprinkel met sout en varsgemaalde swartpeper en pak dan die blaarslaai en spek daarop.
Eindig met die laaste broodjie en jy het een smaaklike trippelbroodjie.
Om die broodjie te sny, het jy vier tandestokkies en ‘n mes nodig. Druk ‘n tandestokkie in die middel van elke kant dwarsdeur die broodjies tot onder.
Sny dan jou vier driehoeke, die tandestokkies sal alles bymekaar hou.

WILNA MYBURGH

HAMBURGER PATTIE
1 kg maalvleis
2 eiers
mince spice na smaak
knoffel stukkies na smaak
sout en vars gemaalde swart peper
gedroogte pietersielie na smaak
125 ml oats(hawermout)

Meng alles deurmekaar en maak die patties en sit in yskas tot voor gaarmaak.
Verhit olie en sit die patties in braai een kant en draai om sodra omgedraai het sit stukkies kaas op tot dit gesmelt het.
Op die burger is daar op die onderste deel botter, avo ge-mash met asyn en sout en peper, blaarslaai, tamatie, uie en ‘n pattie.
Die boonste deel van die broodjie – botter en relish.

Plasing: Annette Breytenbach van Wyk