KARLEN SE VEREBESKUIT

Die bottel op die stoof is die gis. Die groen bak het die bottermengsel in. Dan in jou mengbak gooi jy 4 koppies witbroodmeel en 3 eiers. Dan gooi jy die gismengsel en die bottermengsel by jou eier/meel mengsel . Roer dit. Gooi dan 12 koppies van die silky soft meel by en laat die masjien dit knie vir 20 minute. Maak toe vir so uur. Haal uit en maak jou bolletjies met jou gesmeerde hande. Ek maak 5 broodpanne vol en daars 21 bolletjies in elke pan. MAAK SEKER JOU BOTTERMENGSEL IS AFGEKOEL ANDERS GAAN JOU DEEG TE WARM WEES EN JOU SUURDEEG GAAN VREK !

Gismengsel:
2 pakkies droë gis (10 g)
45 ml suiker
45 ml koekmeel
750 ml sterk lou water
Meng saam in groot fles wat kan toeskroef. Sit eenkant om gis te aktiveer.

Bottermengsel:
250 g WIT botter
3 koppies suiker
3 koppies melk
Smelt alles saam tot gesmelt. Sit eenkant om af te koel.

Klits 3 eiers en gooi dit in jou mengbak met 4 koppies witbroodmeel.
Gooi dan die afgekoelde bottermengsel en die gis mengsel by en roer deeglik.
Maak toe vir n uur.
Gooi dan 12 koppies van die Silky White meel by en knie tot deeg van kante wegtrek.
Smeer hande en maak bolletjies.
Laat jou balletjies oornag rys en bak die volgende oggend.
So 180°C vir 25 – 30 min, of tot dit wegtrek van die kante. Ek sit ‘n stukkie tinfoil oor my panne, sodat die bokante nie so donker bak nie.

Resep en foto’s: Karlen De Koster (eie resep)

KARRINGMELK BESKUIT MET KLAPPER

My baksel karringmelk resep gister gebak, bietjie verander, gaan nou resep plaas. Foto nie baie duidelik nie, is met die tablet geneem in die aand.

1,5 kg bruismeel
2 teelepels sout
2 koppies suiker
500 g stork bake
500 ml karringmelk
3 geklitste eiers

Dan het ek 1 koppie klapper bygesit en die mengsel in twee gedeel by die een helfte mengsel het ek choc chip bygesit.
Meng al die droë bestanddele goed deur.
Smelt die botter sommer in die mikrogolf en laat bietjie koud word. Voeg karringmelk by en klits, Voeg dan eiers by. Meng alles saam tot ferm deeg, meng sommer met die hand. Sit in pan. Bak op 180°C vir plus minus 40 minute. Ek het deur nag in my lou oond uitgedroog.
Foto:   Marie Rheeder Troskie

KLEINMAAT KARRINGMELKBESKUIT
1,5 kg bruismeel
10 ml sout
500 ml suiker
500 g botter of margarien
500 ml karringmelk
3 eiers geklits

Voorverhit oond tot 180 ºC en smeer broodpanne.
Meng droë bestanddele. Smelt botter en voeg karringmelk by. Voeg eiers by en klits goed tot gemeng.
Voeg by meelmengsel en meng deur tot sagte deeg. Maak bolletjies (of verdeel deeg tussen panne vir broodjie) rangskik in panne en bak sowat 1 uur lank tot gaar en lig bruin.
Laat effens in panne afkoel, keer uit en laat verder afkoel.
Breek in bolletjies of sny in skywe en droog tot droog en bros.
Lewer ongeveer 44 stukkies

Resep en foto: Amanda Swanepoel

KONDENSMELKBESKUIT MET ANYS
2.5 kg koekmeel
20 ml sout
320 g suiker
20 g kitsgis (2 pakkies)
2 eiers geklits
1 liter water
250 g gesmelte botter
1 blik kondensmelk
So ongeveer ‘n ½ koppie Anys (minder as jy nie van baie anys hou nie)
Sif meel en sout saam. Voeg suiker en gis by meng goed.
Meng eiers, gesmelte botter en kondensmelk saam.
Maak holte in meel en gooi Eier mengsel in en meng tot n sagte deeg voeg water by soos nodig.
Knie vir 10 min maak toe en laat rys tot dubbel of vir n half uur.
Maak bolletjies en sit in gesmeerde panne.
Laat weer rys en bak 1 uur by 180 ºC.
Ek smeer suiker water bo op so ‘n rukkie voor ek dit uit haal.

Resep en foto: Lettie Martyniuk

RIA SE ANYS BESKUIT

12 koppies koekmeel
desert lepel sout
2 pers pakkies anchor yeast
pakkie anys saad
2 kp suiker
4 eiers geklits in half koppie olyf olie.
1 liter lou warm water

Roer olyf olie mengsel in sterk lou water in.  Sit Alle droë bestandele in knie skottel meng deurmekaa,  voeg vloeistof mengsel by en meng met mes tot redelik ingesny. Knie deur,  gebruik olyf olie op hande om te knie. Voeg meel of olyf olie by tot deeg elasties is. Verdeel deeg in 3 en plaas elke deel in plastiek sakkie. Druk wind uit en knoop toe. Laat staan op kas en laat rys tot dubbel grootte. Knie terug…Rol in balle pak in panne en bak op 180 grade C vir 30 tot 35 minute.  Sny en droog uit indien verkies.

Resep en foto: Ria Magdalena Susanna

MA ALET SE BRUINBESKUIT
My skoonma Alet se resep wat ek al so bietjie verander het oor die jare. Altyd heerlik!
1 kg Nutty Wheat
8 teelepels bakpoeier
1 eetlepel sout
2 koppies muesli
1 koppie klapper
2 koppies semels
1 koppie sonneblom, pampoen, lyn en sesame saad saam gemeng
2 koppies bruinsuiker
500 g botter
2 koppies karringmelk

Meng Nutty Wheat, bakpoeier, sout, klapper, muesli en sade.
Smelt botter en voeg karringmelk by.
Meng meelmengsel en bottermengsel goed.
Skep in gesmeerde oondpan, of beskuitpan.
Bak vir 50 tot 60 minute by 180°C.
Laat dit goed afkoel, sny in vingers en droog uit in die oond oornag teen 60° tot 80°C.

Resep en foto:  Louise Venter‎
2de Foto: Annemarie Fourie – Ek het so bietjie melk bygevoeg, maar seker net so 100 ml.

20 k koekmeel
1 pakkie gis (1/2 k lou warm water om op te los)
5 ml sout
1 blik kondensmelk
250 g botter
Vryf botter in droe bestanddele. Maak gis aan met lou warm water. Gooi kondensmelk in en vryf goed deur. Voeg gis by. Maak aan net lou warm water. +- 1 1/2 liter. Laat goed rys maak panne op en laat weer rys. 180 grade. Bak 50 min of tot gaar. My oorlede skoon moeder se reseppie.
Resep en foto: Poppie Naude
Posted: Amanda Conradie

POPPIE SE KARRINGMELKBESKUIT
500 g botter
1 ½ koppie suiker
5 ml sout
9 koppies bruismeel
3 eiers
500 ml karringmelk
Smelt die botter. Klit suiker, eiers en sout goed saam. Voeg karringmelk by en meng goed. Voeg gesmelt botter by en meng goed deur. Voeg bruismeel by en meng baie goed deur. Plaas in pan en druk af met drukker. Bak 50 mim of tot gaar. 180 ºC.
(Maak 84 beskuite).
Resep en foto: Poppie Naude

GESONDHEIDSBESKUIT IN DIE MIKROGOLF
500 g margarien
375 ml bruinsuiker
1 kg bruismeel
15 ml bakpoeier
knippie sout
750 ml All Bran
500 ml semels
250 ml sonneblomsaad
250  ml korente (kan ook sitrus skil gebruik)
500 ml karringmelk
2 eiers
melk

Mikrogolf die margarien en suiker vir 3 minute by 100 % krag. Roer. Mikrogolf weer 2 minute. Laat effens afkoel. Sif die bruismeel, bakpoeier en sout. Voeg All Bran, semels, sonneblomsaad en korente by. Meng. Gooi karringmelk in ‘n maatkoppie. Voeg eiers by en klits tot gemeng. Vul dan die mengsel met melk aan tot 1 liter. Meng melk- en bottermengsel goed. Gooi in 2 bakke van 21 x 10 x 14 cm. Mikrogolf op 70% krag vir 20 minute. (Een op ‘n keer) sny in snye en dan in vingers. Droog uit in gewone oond.
BRON – Hannetjie Snyman

Hannetjie Snyman:
Ek sny dit as dit nie heeltemal koud is nie, sny dan makliker.
Dit krummel nogal heelwat as ek dit sny.
Ek sproei die bak en sit onder-in kombuis papier (die op die rolle).
Die deeg is baie slap. As dit klaar gebak het, sny ek dit soos ‘n brood, net bietjie dikker. Dan in vingers.
Ek kry so 45 vingers uit een “brood”.

EENVOUDIGE KARRINGMELKBESKUIT
2 kg koekmeel
400 g botter
2 teelepel sout
1 koppie suiker
1 eier
28 g koeksoda
55 g kremetart
3 koppies karringmelk
Sif droë bestanddele saam en meng goed.
Vryf botter met vinger in tot krummels.
Klits eier in melk en meng met droë bestanddele.
Maak bolletjies pak in voorbereide pan en bak vir 25 tot 35 min by 220 ºC.
Breek en droog uit by 70 ºC in  die oond.
Resep en foto: Bettie Smit