JAN SE STEAKBRAAI RESEP
Resep en foto:  Jan Kruger
FOOD LOVERS RECIPES

Ek het verneem dat julle belangstel in baie goeie braai resepte en hier is ‘n beproefde steakbraai resep wat ek al male sonder tal gemaak het vir bitter baie mense met ‘n altyd positiewe terugvoer! Selfs Amor het dit al op RSG die land in gestuur. Ek hoop julle probeer dit en geniet net soos ons almal!

Jy het nodig ( vir 4 boeremense ):

4 x 500 gr goed verouderde steaks ( T-been , kruis of lendeskyf ), 1 – 1.5 duim dik gesny
1 x 750 ml sonneblom olie ( ander olies se vlampunt is te laag )
1 x 470 gr Ms Balls Original Chutney ( ander blatjang smaak nie lekker nie )
1 x 750 ml All Gold Tamatiesous ( ander tamatiesous smaak nie lekker nie )
3 x huisies knoffel, fyn gekerf
‘n Braaitang, nie ‘n vurk nie ( mens seel nie vleis en steek dit dan stukkend met ‘n vurk nie!? )
‘n Goeie sak Rooikrans hout ( sy hittevlak wanneer die kole reg is, is die hoogste en seel dus die vleis die beste )
‘n Tawwe persoonlikheid, want jy gaan armhare skroei en vingers rooi brand

So maak jy:

Lê vleis in in ‘n plastiek of hout bak ( staal gee ‘n onaangename smaak af ) deur al die souse en olies en knoffel te meng en die vleis toe te maak met die hele mengsel aan alle kante – plus minus 2 ure voor jy gaan braai.
Maak ‘n ordentlike vuur met die hele sak hout. Neem genoeg vloeistof in terwyl jy wag aangesien die braai ‘n vinnige maar geweldige warm storie gaan wees wat jou gaan tap van baie liggaamsvog!
Sodra die hout omtrent alles in kole verander het, krap die kole uit in ‘n gelyke bed onder ‘n rooster wat om en by 30cm bo dit is. Dis hier waar jy die armhare en vingers gaan seermaak.
Pak jou steaks op die rooster. Die olie sal nou bo-op die sous in die bak dryf. Giet genoeg  ( maar nie te veel nie ) hiervan eweredig oor die vleis sodat die kole die olie onmiddellik aan die brand steek en jy vlamme het wat al die vleis oorweldig en baie hoer as dit uittroon. Op hierdie punt gaan almal jou vertel hoe jy sopas die beste gehalte vleis voor hulle oë opge#@$ het! MAAR steur jou nie daaraan nie, want die olie seel die vleis en keer dat dit brand. Die geweldige hitte seel weer die vleis.
Draai die steaks almal ongeveer 1 min later om en doen weer dieselfde aan die ander kant.
Gooi nou alle olie af van die sous – dis maklik, want die olie dryf bo.
Braai nou jou steaks sonder vlamme verder deur dit elke keer, as jy dit omgedraai het, eers deur die sous in die bak te smeer voor dit weer vuur toe gaan. Die suiker in die sous karamaliseer op die manier en is dan eetbaar wanneer die steaks klaar is. Jy draai gereeld en braai solank soos wat jy normaalweg jou steak se gaarheid wil hê. Onthou jy kan altyd ‘n te rou steak weer kole toe vat, maar as hy oorgaar is, kan net die hond jou help. Ek en my gesin eet steak Medium – rou, wat beteken dat ons die tipe dikte steak nie langer as so 6 – 7 min aan ‘n kant braai nie.
Moenie die vleis te lank laat rus nie, want ‘n koue stuk vleis werk nie. Moet ook nie sout opgooi voor die steak in elke ou se bord is nie. Die souse het in elk geval van nature baie sout in. Ons doen glad nie sout nie.
Jy kan sous voor die tyd maak en dan oorgooi in die bord of die “gaar” sous wat in die bak oorbly oor die steak in jou bord gooi.
Bykosse:

Jy kan kies tussen 2 beproefde opsies:

Chips, uieringe en mengelslaai.
Sampioene gevul met knoffelbotter en Cheddarkaas ( braai ook op die vuur ), groenbone ( braai in pan met botter ), pampoen en “aartappel met skil” ( opgekook ) gevul met suurroom.
Eet sonder geraas en verlang na al die liefdevolle mense in jou verlede

FILLET  EN TONG MOSTERDROL
Resep en foto:  Rina Kleinhans
FOOD LOVERS RECIPES

TONG
1  heel beestong, vars of gepekel
1 groot ui op gesny
1 groot wortel, in  ringe gesny
6  knoffel vingertjies plat gedruk
½  teelepel heel swart peperkorrels
6 heel naeltjies
2 takkies vars tiemie
2  – 3 lekker groot vars salie blare
2 eetlepels sout

Spoel die tong goed af onder koue water, sit in die stoompot en vul met water tot die tong net onder die water toe is, voeg al die ander bestanddele by.  Bring tot kook punt, sodra pot begin stoom, draai plaat af en laat hy rustig stoom vir 30 min.  Haal die pot van die plaat af, MAAR MOENIE OOPMAAK NIE.  Laat hom net so staan tot die stoom heeltemal afgegaan het.  Maak oop en sit tong op bord tot redelik afgekoel, trek die vel van die tong af en verwyder enige vet indien daar is, sit tong eenkant om heeltemal aftekoel. Sny die tonge se kante af dat dit ‘n mooi vierkantige stuk vleis is..  Gebruik die wat jy afgesny het vir toebroodjies of om koud te eet.

FILLET
1  redelike groot fillet steak
Dijon mosterd
songedroogte tamaties

Sny die fillet op sy lengte tot amper deur (butterfly), maak hom  oop op jou  snyplank met die gesnyde kante na onder, sny nou die twee vet wange van die binne kant na buite , maar weer nie deur nie sodat dit weer butterfly, doen dit weerskante, nou het jy een groot lekker plat stuk fillet.  Kap die fillet bietjie met ‘n vleis hammer of kant van ‘n piering.  Smeer die fillet lekker met Dijon mosterd en pak die hele fillet met songedroogte tamaties uit, sit die tong op die een punt en rol toe in die fillet, tot die hele tong toe is .  Neem tou en maak die fillet op ‘n paar plekke vas om alles in plek te hou.  Rol nou die hele rol in growwe vars gemaalde swart peper en sit sommer so paar lekker heel korrels ook tussen in.  Sit in die yskas oornag dat die geure lekker kan trou.

BRAAI
Meng helfte balsamiek asyn en olyfolie.  Maak seker jou vuur is nog warm genoeg vir lekker vlamme.  Plaas die rol op die rooster en smeer lekker met die mengsel dat dit kan vlamme maak, draai en doen dieselfde met al 4 kante.  Sprinkel sout oor, en braai verder oor matige kole ongeveer 25 – 30 min hang af hoe gaar julle hom wil he.  Hou dop dat die dik kante waar die fillet oor mekaar is, langer op die kole bly.  Mens kan mooi op die oop kante sien hoe ver is die vleis gaar, so as jy van ‘n bietjie “ rooi” hou, haal hom vroegtydig af.  Sit op ‘n opdien bord, druk ‘n suurlemoen uit oor die hele rol en laat rus ongeveer 10 min voor jy die rol sny en bedien. Sny versigtig met ‘n gladde skerp mes.
MOSTERDSOUS
500 ml room
30 ml heel korrelmosterd
40 ml heuning
1 teelepel Dijon mosterd
3 teelepels mosterd poeier en ¼ teelepel borrie aangemaak met bietjie water
2 knoffel vingertjies of meer indien verkies, hou heel
1 teelepel maizina en 1 teelepel bisto aangemaak met bietjie water
sout na smaak

Verhit die room, mosterd (al twee), knoffel en heuning tot kookpunt, kook lekker vinnig vir ‘n rukkie. Voeg die aangemaakte mosterd en borrie by en kook lekker deur.  Laat kook vir ‘n rukkie, voeg die aangemaakte maizenamengsel by en roer vinnig dat dit ‘n lekker gladde mengsel is. Dit sal nou lekker dik wees, pasop vir aanbrand.  Haal die knoffel uit en proe vir sout.   Sout na smaak.
Bedien warm saam met die gesnyde rol.

Nota:  Hierdie rol is die volgende dag eers lekker as koue vleis.
Lekker eet , hoop julle geniet dit baie.

MUSHAVI FILLET MET OESTERVULSEL IN NETVET

1 Groot bees fillet heel
Netvet groot genoeg om fillet gemaklik te omsingel
1 Blikkie gerookte oesters in stukkies gesny
1 Blik ingelegde perskes in stukkies gesny
3 groen Appels in klein stukkies gesny
1 Teelepel Fennel saad
1 Teelepel growwe swart peper
1 Teelepel heel swart peper
2 Knoffelfhuisies fyn gesny
1 Plat eetlepel growwerige sout
125 ml Kikoman Soyasous
125 ml Balsamic Assyn
1 Suurlemoen se sap
Handvol vars Pietersielie, sweet basil, roosmaryn opgekap en gemeng
Handvol Fennel takkies vir garnering nadat vleis gaar is

Vat een glas rooiwyn en drink dit
Plaas skoon gesnyde fillet op oop netvet
Maak snye oor breedte deur fillet tot amper deur elke 3cm uitmekaar|
Meng vloeistowwe, knoffel en pepers en gooi oor vleis
Meng alle bestandele goed behalwe vars fennel en prop dit in die snye van die fillet
Vou netvet om fillet en steek vas met tendestokkies
Laat staan in vleisbak in yskas vir ‘n dag

Braai die fillet oor baie matige kole om nie die netvet the verbrand nie maar wel te braai. Draai tweekeer om. Jy kan growwe sout oor netvet strooi dat hy mooier kan karmanaliseer, maar dis nie nodig nie. Braai tot netvet gaar is en fillet medium en sappig. Strooi fyn fennelblaatjies en stingeltjies oor en dien op deur langs die vulsels deur te sny.

Drink verskeie glase rooiwyn tydens die proses….

Resep en foto: Deon Huysamen

MURGBENE, MASH EN SLAAI
Baie eenvoudig, cook en spray jou pannetjie en pak die bene langs mekaar uit, smeer lekker met olyf olie, sout en peper en ‘n bietjie BBQ spice.
Dash met ‘n woestersousie, draai bene om en herhaal olie en spice.
Bak in warm oond, so ongeveer 180°C vir omtrent 20 to 30 min. voila…waterbek lekker en vinger aflek beslis

Resep en foto: Amanda van Dyk

MONIKA SE VLEIS SLAAI

Maar ek werk nie met presiese hoeveelhede nie, so verskoon maar asb.
Ek kook ‘n groot stuk bees silverside of topside in die drukpot met lekker geur middels soos uie, wortels, lourier blare, swart peper korrels en moster saadjies, sout en water tot dit gaar is. Laat staan dit dan in die pot tot heeltemal afgekoel. Sny dit dan in klein blokkies of trek uitmekaar met 2 vurke en gooi in ‘n meng bak.
Voeg by fyn gekapte uie, green & red pepper, gherkin, hardgekookte eiers, ‘n botteltjie gerasperde beet, ‘n biedjie mosterd poeier en mayonnaise en meng goed deur. Dit is op sy lekkerste die volgende dag.

NOta:  Mens kan self tong gebruik vir hierdie slaai

Monika Wichert

BEESVLEIS KOFTAS MET ROOISOUS
Resep geplaas en foto: Elsa Van Antwerpen Kleinhans
FOOD LOVERS RECIPES
1 kg maalvleis
5 ml fyn koljander
30 ml vars koljander fyn gekap
5 ml fyn komyn
1 stingel suurlemoengras fyngekap
1 groot eier
30 ml mielieblom
Sout en peper na smaak

Meng al die bestanddele saam en vorm langwerpige balletjies.
Rol in koekmeel.
Braai in vlak olie tot net bruin.

ROOI SOUS
2 rooi soetrissies in helfte gesny en gerooster onder element tot geskroei en swartrek vel af.
1 x 423 g blik gekapte tamaties
125 ml ongegeurde yogurt
5 ml suiker

Verwerk al die bestanddele in voedselverwerker tot glad.
Verhit en bedien saam met Koftas.
Garneer met gekapte kruisement.

BEESVLEISPOTJIE
1 kg stowebeesvleis opgesny
olie
1 groot ui opgesny
vars kruie – roosmaryn, tiemie, sage
1 teelepel fyn gemmer
2 teelepels vleisspessery – steak en chops
2 eetlepel asyn
2 eetlepel sojasous
sout/peper
4 groot aartappels geskil en gesny in stukke
4 groot wortels geskil en gesny in stukke of skywe
500 ml kookwater

Braai vleis in olie tot bietjie bruin.
Voeg uie en kruie by en braai nog 10 minute en voeg kookwater by met sojasous, asyn, gemmer en spesery.
Laat kook vir 1 ½ uur.
Pak laag wortels.
Pak laag aartappels op vleis, strooi sout en peper oor.
Kook tot groente sag is, voeg nog water by indien nodig.
Kan sous verdik met bietjie Bisto gemeng met water.
Bedien met rys.

Resep en foto: Marie Dumas Jennings