VINNIGE SUURLEMOEN SKUIMTERT

VINNIGE SUURLEMOEN SKUIMTERT
Kors
1 pakkie Marie beskuitjies ( gebruik maar liewers die Beauman’s een .. (Die goedkoper weergawe maak klonte)…. 125 g margarien/botter
1 teelepel fyn kaneel
2 teelepels suiker

Smelt margarien in kastrol. Plaas mariebeskuitjies, kaneel en suiker in voedselverwerker en maak goed fyn. Voeg by gesmelte margarien en roer goed tot al die krummels met die botter bedek is en nog baie krummelrig is.  Druk korsmengsel in tertbord. (Ek gebruik n teelepel hiervoor. Werk die beste om die bodem en rante ewe dik te kry) Bak kors vir 10 minute teen 180ºC

Vulsel
4 eiers geskei
1 x 397 g blik kondensmelk
125 ml vars uitgedrukte suurlemoensap (bottel suurlemoensap maak teveel sous)
1 ½ teelepel fyngerasperde suurlemoenskil
1 eierwit

Meng die eiergele, kondensmelk, suurlemoensap en suurlemoenskil liggies (moet nie klits nie. Roer dit stadig deur tot dit goed gemeng is. As jy die mengsel te vinnig roer, dan word dit pap) Klits eierwit styf en vou in mengsel in. Giet die vulsel in die afgekoelde kors. Sif 1 ½ teelepels Maizena oor die vulsel (dit is vir die stroperigheid wat dalk wil vorm om te stol)

Bolaag
3 eierwitte (wat oorgebly het)
½ koppie suiker
1 teelepel kremetart

Klits die eierwitte tot sagte punte vorm. Klits die suiker en kremetart bietjie-bietjie by. Hou aan klits tot dik en blink. Skep lepels vol op vulsel. Vorm punte met ‘n vurk. Bak vir 15 minute teen 180ºC of tot punte goudbruin is.
Resep en foto:  Petré Van Jaarsveld