OUMA SE BOEREWORS PASTEI

boerewors pastei poppietested

OUMA SE BOEREWORS PASTEI
Bedien 4-6
Bestandele
1 pakkie Ouma se boerewors
20 ml botter
2 groot uie, fyngekap
250 g sampioene, dun gesny
10 ml (2 t) fyn koljander
5 ml (1 t) sout
250 ml (1 k) gevriesde ertjies
15 ml (1 e) koekmeel
125 ml (1/2 k) beesvleisaftreksel
400 g skilferkorsdeeg, ontdooi
Meel vir deeg uitrol
80 g cheddar kaas
1 eier, geklits

Voorverhit die oond tot 200 °C.

Metode:
Braai die wors in die pan, hou dit heel en draai dit dat dit rond is. Verwyder en laat dit afkoel.
Smelt die botter en braai die uie tot sag, maar nie bruin.
Voeg die sampioene by en laat dit stadig braai saam met die uie.
Voeg die koljander, sout en die gevriesde ertjies by. Laat dit vir ongeveer 5 minute saam kook oor ‘n matige hitte.
Voeg die meel by en roer tot al die bestanddele goed deur die meel bedek is.
Voeg die aftreksel by en roer goed.
Laat die mengsel stadig prut oor ‘n lae hitte, tot die meel gaar is. Verwyder en laat dit afkoel.
Rol die skilferkorsdeeg dun uit op ‘n meel bestrooide oppervlak.
Smeer ‘n 20 cm pastei bak liggies met botter of spuit met kleefvrye sproei.
Meet die skilferkorsdeeg in die pastei bak, om te pas as die basis van die pastei. Laat dit liggies sak in die bak en maak seker dat dit mooi egalig pas.
Sny die oortollige deeg af om as die boonste gedeelte van die pastei te dien. Onthou om genoeg van die deeg te laat oorhang aan die kante van die pastei bak, aangesien die deeg wel krimp.
Sit die hele gaar wors-wiel in die middel van die deeg basis, voeg die afgekoelde sous by en besprinkle met kaas.
Gebruik die oortollige deeg en vorm die bedekking vir die pastei.
Smeer die geklitste eier liggies op die deeg basis van die pastei. Pas die deeg bedekking netjies bo-oor en knyp die kante met ‘n vurk om seker te maak die pastei is heeltemal geseë.
Borsel die res van die eier liggies oor die pastei. Maak 2 snytjies in die pastei deeg om die stoom te laat ontsnap.
Sit die pastie in die oond en laat dit bak vir ongeveer 15-20 minute of tot die deeg goudbruin en gaar is.

Resep geplaas deur Benhet Niewenhuis
Foto en nota:  Benhet Nieuwenhuis  – Ek het ‘n blikkie sweet corn ook ingesit en dit was heerlik.




TUISGEMAAKTE BOEREWORS

 boereworstested
TUISGEMAAKTE BOEREWORS

6 kg Beesvleis
4 kg Varkvleis
90 ml sout
20 ml pepper
80g koljander
6 ml neut
3 ml naeltjies
400 ml bruin asyn
12 g Pickeling Spice
Maak jou pan warm en maak jou koljander daarin warm voordat jy dit maal. Ek maal en gooi deur n sif en dit wat agter bly maal ek weer en gooi deur sif.
Sny jou vleis in blokkies en maal dit met jou masjien.
Gooi daardie gemaalde vleis oop op n oppervlakte en strooi al jou speserye en sout en pepper en asyn oor en meng dit baie goed. Jy het sterk arms hier nodig!! maak n klein worsie op n bordjie en kook bietjie in die Mikrogolf om te proe. As die smaak reg is volgens jou stop die vleis in jou casing en maak seker jy stop nie te styf nie en daarshy!! Jou eie boerewors en jy weet wat daarin is. Ons maak natuurlik seker dat die varkvleis wat ons in sit lekker vet is. As jy boerewors maak kan jy nie gepla wees oor vetmaak nie anders mors jy al jou produkte

.Geniet hoor

Resep:  Marianne Jacoby




BOEREWORS MET DROE VRUGTE

tested

BOEREWORS MET DROE VRUGTE

Lewer 4-6 porsies

250 g gemengde droë vrugte
25 ml suiker
250 ml water
6 aartappels, geskil en in dun skywe gesny
sout en peper
vars gerasperde neut
5 ml fyn koljander
500 ml beesvleisaftreksel
1 kg boerewors

Kook vrugte, suiker en water saam.
Rangskik aartappels in ‘n gesmeerde oondpan.Geur met sout, peper, neut en koljander.
Voeg aftreksel by en plaas wors bo-op.
Bak in ‘n voorverhitte oond (200°C) tot gaar.
Skep droë vrugte by en bedien.

Cecilia Bedser – Uit my resepteversameling van 40 jaar




BILTONG BOEREWORS

biltong boerewors

BILTONG BOEREWORS

2 kg Rou bees biltong vleis reeds gepekel.(vra jou slagter om vir jou maak) Grof gemaal.
800 gram lam stert vet gemaal
1.5 kg wors derm
100 gram freddy hirsch biltong spice
100 gram freddy hirchs boerewors spice mix

Meng gemaalde vleis en vet goed saam.
Voeg die speserye by en meng baie goed deur.
Stop die derms redelik ferm maar nie te styf nie.
let wel moet nie enige sout by die vleis mengsel voeg nie.
Hierdie is die maklike resep, maar as jy jou eie vleis wil pekel staan dit jou vry, moet my net nie vra om te help nie.

P.s. hierdie is nie n goeie pan wors nie, en moet nooit dood gebraai word nie, anders is dit droë biltong wors.lol
Franco Dippenaar



VLAKVARK SALAMI

salami jantjie

VLAKVARK SALAMI

Hier is n resep wat ook vir my baie lekker is :
8kg wildsvleis ,
15kg vlakvark ,
7kg skoon spek en
2kg ys
( Freddie Hersch salami ) .
As als gemeng en gemaal is en gestop is moet dit 1min. vir elke mm in 70 grade water gehou word ( 60mm – 1 uur ) . hang in koelkamer vir 24 ure .dan kan jy met die rook proses begin ek gebruik koue beroking . hang op in koel plek om te verouder . Hoop dit help

Jantjie Liebenberg




Outydse Karoo Boerewors

OUTYDSE KAROO BOEREWORS

500 g beesvleis
500 g varkvleis
1 kg skaapvleis – nie te maer nie
250 g varkspek [ ongerook ]
12.5 ml port
25 ml druifasyn
12.5 ml brandewyn
3 t sout
3 ml geskroeide koljander [ fyn gestamp]
3 ml witpeper
3 ml neutmuskaat – vars
1 ml fyn naeltjies
3 ml marjoram
6 salieblare fyngekap
1 e lemoenskil fyn geraper [ net die geel gedeelte ]
worsderms
sny al jou vleis in blokkies, strooi jou speserye oor , asook die sout , laat staan ‘n ruk. maal nou die vleis. sny die varkspek in baie klein blokkies en strooi oor die vleis. sprinkel die vloeistowwe oor en meng met jou vingers se punte, liggies tog deeglik. stop.
ek dink die geheim le ook in die gaarmaak. vir my moet wors net – net gaar wees, tog nie droog gebraai nie, as jy hom pan gaar maak gooi ‘n bietjie water onder in die pan en as jy hom vuurgaarmaak rol hom dig op en draai net een keer om, moet nie prik nie.

Leon Smit




MAAK VAN SALAMI EN RUSSIANS

salami jantjietested

MAAK VAN SALAMI EN RUSSIANS

SALAMI KURSUS: [ALLES OOR VLEIS]
[Kos vir kampeerders met idees vir kampering.]
Die Speserye wat beskikbaar is in die mark om salami, cheesegriller en cabanossi mee te maak, is almal gebasseer op bees- en varkvleis.
Speserye beskikbaar by Crown National, Freddy Hirsch en Salamus, om net ‘n paar verskaffers te noem.
Ons gaan wildsvleis gebruik. Nou ontstaan die vraag watter wildsvleis kan gebruik word. Ja, enige wildsvleis, veral vlakvark en sebra word redelik gereeld gebruik om salami mee te maak. Wat belangrik is, hoe beter die snitte, hoe beter die eindproduk
Die aanwysings op die Speserypak gee jou hoeveelhede van vleis en spek wat gebruik moet word. Kry die totaal van al die vleis en spek om jou verhouding tussen wildsvleis en varkvleis te bepaal.
Onmiddelik ontstaan die vraag: wat is die verskil tussen russian en salami?
Al verskil tussen hierdie twee produkte is die tipe derm waarin jy die eindproduk gaan stop.
Crown National se Russian Cooked Salami Spesery pak:
Die totale hoeveelheid vleis is 15 kg
Afhangennde van die beskikbare varkvleis-spek verhouding, asook jou eie keuse van hoeveel vet jy in jou salami van hou, word die verhouding soos volg bepaal:
Indien jy helfte wildsvleis en helfte varkvleis 70:30 gebruik (7.5 kg en 7.5kg) gaan jou salami effens aan die vetkant wees. Gewilde keuses is 9kg wildsvleis en 6 kg 70:30 varkvleis. Persoonlik sal ek nie ‘n laer verhouding gebruik as 9:6 nie. Die wildsvleis wat ons gebruik staan bekend “Basisvleis”
In die speserye pak is daar ‘n kleiner sakkie met Praaksout.
NOTA: Gebruik ALTYD plastiek handskoene.

SALAMI
Voorgestelde resep:
8.5 kg koue wildsvleis
6.5 kg 70:30 varkvleis
Yswater (2.5 kg ys en 2 liter water)
1 Pak Russian Cooked Salami speserye
50g Geel mosterdsaad
50g grofgemaalde swartpeper
15 tot 18 Salami casings
Plastiese handskoene
Metode
Weeg die hoeveelhede vleis af en maal deur ‘n 13 mm sif.
Meng die Praaksout met die gemaalde vleis. Dra jou handskoene!
Voeg die res van die pak speserye by.
Voeg ys en water by.
Voeg 50g geel mosterdsaad en 50g grofgemaalde swartpeper by en meng deeglik.
Maal dan weer deur ‘n 4mm sif.
Plaas mengsel in worsstopper en stop in salami casings.
Bind opening stewig vas met toutjies.
Hang in koel area vir 12 ure om af te droog.
Verhit kookpot tot 70 grade C en hang salamis daarin
Beheer die temperatuuur tussen 70 en 72 Grade C.
Die tydperk van kook word soos volg bepaal 1 minuut per 1 mm dikte van die salami wors.
NOTA: Die belang van die temperatuur is soos volg. Vet smelt sodra die temperatuur 72 grade C oorskry en dit moet jy te alle tye verhoed, spesifiek by die maak van Salami.

Russians en Cheese grillers
Pekelwenk: Die varkvleis kom gewoondelik in gesnyde stroke. Pekel die stroke deur gebruik te maak van Crown National se Instant Cure. Los dit op in water en plaas 6.5 kg van die stroke varkvleis in die pekel vir 6 ure. Haal uit en laat winddroog word. Eintlik is dit nou bacon. Indien jy ‘n roker het, koud-rook dit vir 12 ure.
Die worsderms wat gebruik word om Russians en Cheese grillers mee te stop, staan bekend as “Russian Long” (die dikke) en die dun derm wat gebruik word, as CAM22.

Russians:
8.5 kg koue wildsvleis.
6.5 kg gepekelde varkvleis, in blokkies gesny.
Yswater (2.5 kg ys en 2 liter water).
1 Pak Russian Cooked Salami speserye.
Metode
Maal die basis vleis deur ‘n 4 mm sif – hoe kouer, hoe mooier maal die vleis.
Voeg gepekelde vark wat in blokkies gesny is, by, saam met Praaksout en meng deeglik.
Voeg res van die pak speserye by en meng.
Voeg yswater by, meng en maal weer, maar hierdie keer met ‘n 6mm sif.
Stop in derms, vleg worsies en kook teen 70 grade C vir 30 min.

Cabanossi:
Bestanddele
9 kg koue wildsvleis.
5.5 kg 70:30 varkvleis.
1 pak Gold Crown Cabanossi spesery.
1 Liter yswater
Metode
Maal basisvleis en varkvleis saam deur ‘n 12 mm sif
Voeg Praaksout by die gemaalde vleis soos dit uit die meule kom.
Voeg die res van die speserye by meng goed.
Voeg dan die ys water by en meng.
Maal weer deur ‘n 4 mm sif en stop in dun derms.
CAM 22 is die beste derms om te gebruik
Hang op om te droog. Plaas in vrieskas sodra dit droog is.

Cheese Grillers:
Bestanddele
7.5 kg koue wildsvleis as basisvleis
3.5 kg koue 70:30 varkvleis in blokkies gesny. Gepekelde vark smaak heerlik!
1kg bees-lyfvet of brisketvet, in blokkies gesny.
2 kg cheddarkaas, in blokkies gesny.
I pak Crown National Cheese Griller Speserye.
Metode
Maal die basisvleis deur ‘n 4 mm sif.
Meng die res van die vleis en kaas.
Meng Praaksout en dan die res van die speserye.
Voeg dan die yswater by meng en maal deur ‘n 6mm sif.
Stop in Russian Long derms, vleg en kook vir 30 min teen 70 Grade C. Indien jy gepekelde vark gebruik kan jy dit selfs deur ‘n 8 mm sif maak

Bron: Berie Smith

Foto: Jantjie Liebenberg

WAT IS PRAAKSOUT?
Salt of Prague, of Pienksout, of red cure, of Quick Red cure is al die name waaronder dit bekend staan, dit is n mengsel van salpeter, en ander nitrate, wat help met die fermentasie van die salamis, dat dit nie sleg word nie.. – Stefaans Blaauw




LEWERWORS ALA RIA

FOOD IS ESSENSIALtested

LEWERWORS ALA RIA

Vir die afvalliges: wanneer jy weer ‘n ou skaapbinnegoedjie of beeslewer kry en nie weet wat om met dit te maak nie ..doen die volgende.
Braai uie na smaak, voeg knippies naeltjies, neut en koljander by, sout en peper en bietjie asyn..jy kan van die pensnetvet ook insit maar dis opsioneel..of gebruik jou gewone worsspeserye.

Meng dan die rouvleise, gooi halfkoppie of meer rou hawermout saam met al die ander bestanddele in die roumengsel. Knoop ‘n paar derms, ryg een een op worsstopper en stop lewermengsel soos boerewors. Knoop die anderkant van die derm ook. Jy kan vir veiligheid ‘n toutjie weerskante byknoop vir ingeval. Vries in mooi opgerolde worse. Wanneer jy dan weer pap en lewer eet, braai oor die kole. Mense dis lekkerder en makliker skilpadjies!
Oepsie. *Meng en maal die rouvleise voor jy dit in derms stop. Dis nou so uit die kop neergeskryf, het nie ‘n rerige resep wat op papier neergeskryf is nie.

Ria N. Pieterse

 




TAMATIE BRAAI WORS

wors
TAMATIE BRAAI WORS

Bederf die familie met die dis. Dis maklik om voor te berei en dit smaak heerlik. Die resep kan as wors of as frikkadelle voorgesit word.
500 g Wildsvleis
250 g Varkvleis
100 g spek
½ Tlp sout
½ Tlp fyn naeltjies
½ Tlp fyn neutmuskaat
½ Tlp gedroogde Basil
2 Knoffel huisies
1 Groot ui fyn gesny
3 Ryp ontvelde tamaties in skywe gesny
1 Eetl bruinsuiker
2 Eetl suurlemoensap.
½ Koppie koue water
½ Tlp Gemaalde swartpeper
1 Koppie droë broodkrummels
Metode
Meng bestanddele saam en maal. Meng en maal ‘n tweede keer.
Stop in derms of vetderm.
Plaas in ‘n broodpan en maak maalvleis brood of frikkadelle

 

 




PETRA SE EIE WORS

petra se wors 1

PETRA SE EIE WORS

GEEN MEULETJIE NIE, EN GEEN DERM/SKIN nie …

Jy vat maalvleis of gemaalde hoender of vark of wat ookal, dan gooi jy jou eie speserye by, ek het stukkies rou bacon en kaas ook ingegooi, dan rol jy hom op in GLING WRAP. (‘n goeie tip, soos wat jy die cling wrap uit die boks trek, spuit hom met Spray and Cook dan klou hy nie), Gooi ‘n eierwit in jou vleis mengsel en rol hom op so dik of dun soos ‘n wors, rol die punte mooi styf en sit al jou worse in ‘n pot met kook water op die stoof vir 8 minute. Haal dit uit, rol dit oop, sit pan op die stoof met olie in, sit jou worse daarin en braai bruin alle kante, gooi dan stukkie botter in en gebruik daai gesmelte botter en gooi bo oor wors. Hy breek nie en jy gaan sukkel om lekkerder wors te eet, ek gooi knoffel ook in

Petra Prestoruis