WASHIELAH SE SAMOOSAS
Kyk die blare is mos verkrygbaar by meeste van ons supermarkte deesdae. So jy koop ‘n pak en volg die instruksies daarop vir die vou proses. Die vulsel idees is oneindigend.
Vulsel:
500 g maalvleis
1 bossie vars dhanja / solantro gewas en opgekap
2 uie fyn opgesny
5 ml fyn koljander
5 ml barishap
5 ml kerriepoeier
5 ml borrie
Stoom die uie in die mikrogolf vir ‘n paar minute om eers uit te sweet. Verhit bietjie olie in ‘n pan op die stoof en braai die uie tot bruin, voeg die speserye by en braai tot die geure ontwikkel. Voeg die maalvleis by met ongeveer 20 ml water. Voeg die dhanjah /solentro by. Laat die vleismengsel stadig prut tot gaar en meeste van die water verdamp het. Vul die samoosadeeg met die gaar vleismengsel en rol op volgens die instruksies.
Notas – Maak ‘n lekker droë maalvleiskerrie, wat nie baie souserig is nie en vul die samoosadeeg repe daarmee, jy kan ook hoender- of volstruismaalvleis gebruik.
Of wat van kaas in blokkies gesny, fyn vars knoffel en fyn groen rissie?
Vou die samoosadeeg reep eenmaal, sodat dit’n driehoek vorm, vul dan die opening eers met die kaas gevolg met die rissie en knoffel. Vou die driehoek heeltemal toe, lekker styf, maak seker daar is niks lekplekke of openings in die driehoek nie.
Die samoosas kan gevries word of dadelik gebak word in olie. Dit kan ook op ‘n bakplaat, geverf met olie (of nie) in die oond gebak word by 190ºC tot goudbruin aan albei kante.
Die samoosas kan ook gevul word met opgekookte blokkiesaartappels, gemeng met dhanjah sade, mosterd sade, sout en peper na smaak.
Vir ‘n Durban bom, gebruik die klein ronde rissies. Sny die samoosa deeg in die lengte deur, vir 2 reghoekige velle. Vou soos normaalweg die deeg met slegs die rissie daarin.
Speel rond met verskeie vulsels, ‘n samoosa hoef nie net met kerrie gevul te wees nie en dit hoef nie net in olie gebraai te word nie, bak dit in die oond, geen olie word gebruik nie.
Resep en foto: Washielah Adams
Done